Kæru Garðbæingar - Takk fyrir stuðninginn

Ég þakka af heilum hug stuðning ykkar í prófkjörinu og er þakklátur fyrir árangurinn, ekki síst þá staðreynd að 661 kjósandi valdi mig í fyrsta sætið og um leið það sem ég stend fyrir í pólitík - traust og heiðarleika.

Í aðdraganda prófkjörsins fann ég fyrir miklum og jákvæðum straumum meðal Garðabæinga sem töldu að nú væri kominn tími breytinga og nýrra áherslna í Garðabæ. Verð því að viðurkenna að mínar væntingar voru meiri, ekki bara fyrir mig persónulega heldur líka fyrir hönd kvenna og ekki síst fyrir hönd ungu kynslóðarinnar sem er að alast upp í Garðabæ og hefur áhuga á pólitík.

En lýðræðisleg afstaða Garðbæinga er skýr sem og niðurstaða prófkjörsins, ég vil því nota þetta tækifæri og óska kjörnum oddvita flokksins Erlingi Ásgeirssyni til hamingju með sigurinn í prófkjörinu. Ég þakka einnig meðframbjóðendum mínum samskiptin á undanförnum vikum og óska þeim til hamingju með þeirra árangur í prófkjörinu.

Að lokum vil ég sérstaklega þakka öllu því frábæra fólki sem lagði mér lið og stuðlaði að heiðarlegri og glæsilegri prófkjörsbaráttu.

Með kveðju
Páll Hilmarsson